12-13-11 Voice 001

ANG LUMAKAD NG MATULIN, MATINIK MALALIM. ANG LUMAKAD NG MARAHAN, MATINIK MABABAW.

Christmas Kills

2011-12-11 15:00

Ito ang ikatlong araw mula nang ika'y umalis

Taglay mong kalayaan kinuhang kaybilis

Hatid sa iyo'y kapanabikan sa mundong di pa nasilayan

Hatid sa ami'y kalungkutan nitong iyong paglisan.

Bakit tila bigla kang nagbago?

Bakit ang lahat ay pinagpalit mo?

Bakit yaring panandaliang kaligayahan

Ang pinili kaysa iyong kinabukasan?

Ngayong darating na kapaskuhan

Ang aming prinsesa, o nasaan?

Puso namin anong kay panglaw

Kaysakit tanggapin, sa kaligayahan ay uhaw.

Sa iyong pag-alis, mundo'y tumigil sa pag-ikot

Pait ng luha, dulot sa ami'y matinding takot

Tanging hiling, ika'y Kanyang gabayan

Tanging hiling, iyong kaligtasan.

Wala nang papalit sa sayang dulot ng iyong ngiti

Kahit anong regalo wala ni isang makahihigit

Makita kang maligaya, o anong tuwa!

Ngunit pumanaw ang Pasko ngayong ika'y wala.

Aking inakala, Pasko'y nagbibigay saya

Subalit ako pala'y nagkamali, ngayon alam ko na

Isang matalim na sandata, itinarak sa aming puso

Pinatay mo, o Pasko! Buhay nami'y tuluyan nang huminto.